სიახლეები

სამცხე - ჯავახეთის სახელმწიფო უნივერსიტეტი ბევრი კარგი ღონისძიების მოთავეა. მათ შორის ერთ - ერთია სამცხე - ჯავახეთის მხარის მოსწავლეთა კონფერენცია ,,მოსწავლის თვალით დანახული აგრარული პრობლემები სამცხე - ჯავახეთის მხარეში.“
2018 წლის 19 მარტს, უნივერსიტეტმა, ზაზაძის სახელობის საკონფერენციო დარბაზში, უკვე ტრადიციად ქცეულ, რიგით მესამე კონფერენციას უმასპინძლა, სადაც აგრარული პრობლემებით დაინტერესებული მოსწავლეები და მათი პედაგოგები ჩართული იყვნენ მხარეში შემავალი თითქმის ყველა მუნიციპალიტეტის საჯარო სკოლიდან.
კონფერენციის მონაწილეებს მიესალმა, წარმატებული და ნაყოფიერი მუშაობა უსურვა უნივერსიტეტის რექტორმა , ასოცირებულმა პროფესორმა მაკა ბერიძემ, სამეცნიერო ნაწილის ხელმძღვანელმა, პროფესორმა მერაბ ბერიძემ, ინჟინერიის, აგრარულ და საბუნებისმეტყველო მეცნიერებათა ფაკულტეტის დეკანმა, პროფესორმა გიორგი მესხმა, ხოლო აუდიტორიის წინაშე აგრონომიის საბაკალავრო პროგრამის პრეზენტაციით წარსდგა ღონისძიების სულისჩამდგმელი, ასოცირებული პროფესორი ზაირა ტყრბუჩავა.
კონფერენციის გახსნისა და მისალმებების შემდეგ მოსწავლეები ორ სექციად დანაწილდნენ და გააგრძელეს მუშაობა. მოსწავლეების მიერ წარმოდგენილი თემატიკა იყო მრავალფეროვანი და საინტერესო, რაც ყველაზე მთავარია მოსწავლეები თამამად საუბრობდნენ აგრარულ სექტორში არსებული პრობლემების გადაჭრის გზებზე.
მომხსენებლებს შორის საუკეთესოებიც გამოირჩნენ: პირველი ადგილი წილად ხვდა აწყურის საჯარო სკოლის XI კლასის მოსწავლე გიორგი სუხიაშვილს; მეორე ადგილი ვარხნის საჯარო სკოლის IX კლასის მოსწავლე ნინო გორგოძეს; მესამე ადგილი ლელოვანის საჯარო სკოლის X კლასის მოსწავლე დემეტრე ფორჩხიძეს. თემის საუკეთესო პრეზენტაციისთვის კი დაჯილდოვდნენ ახალციხის პირველი საჯარო სკოლის მოსწავლეები: მარიამ და გიორგი ნადირაძეები. ამავე დროს კონფერენციის მონაწილე ყველა მოსწავლე დაჯილდოვდა ღონისძიების მონაწილის სერთიფიკატით.
სამცხე - ჯავახეთის სახელმწიფო უნივერსიტეტი მადლობას უხდის საჯარო სკოლის დირექტორებს, ხელმძღვანელ პედაგოგებს,თემის პრეზენტატორ მოსწავლეებს, ღონისძიების ორგანიზატორებს: ასოცირებულ პროფესორ ზაირა ტყებუჩავას, სამეცნიერო სამსახურს, საზოგადოებასთან ურთიერთობს განყოფილებას, კონფერენციის მაღალ დონეზე წარმართვისათვის.

agro

ევროკავშირისა (EU) და გაეროს განვითარების პროგრამის (UNDP) მხარდაჭერით, ივანე ჯავახიშვილის სახელობის თბილისის სახელმწიფო უნივერსიტეტის დავის ალტერნატიული გადაწყვეტის ეროვნული ცენტრი (TSU NCADR)  ახორციელებს მედიაციის აკადემიური გაძლიერების პროექტს(Academic Enhancement of Mediation) რომლის ფარგლებშიც 2017 წლის 9-10 დეკემბერს თბილისისა და რეგიონების 10 უმაღლესი სასწავლებლის 20 ლექტორს ჩაუტარდა საბაზისო ტრენინგი მედიაციაში, ხოლო ა/წ 25-26 თებერვალს მათ წარმატებით გაიარეს სწავლების მეთოდოლოგიის პროგრამა უნივერსიტეტებში მედიაციის კურსების დანერგვის მიზნით.
ამ პროგრამაში სხვა უმაღლესი სასწავლებლის ლექტორთა შორის, სამცხე - ჯავახეთის სახელმწიფო უნივერსიტეტის მოწვეული პედაგოგები: მარიკა ჩიტაშვილი და ნინო ზედგინიძე იყო ჩართული.

მიმდინარე წლის 9 მარტს, სამცხე-ჯავახეთის სახელმწიფო უნივერსიტეტის სტუდენტებისთვის დატრენინგებულმა ლექტორმა მარიკა ჩიტაშვილმა გამართა საჩვენებელი ლექცია სწავლების თანამედროვე მეთოდოლოგიის გამოყენებით, ხოლო შემდეგ დამსწრე აუდიტორიისთვის: პროფესორ - მასწავლებლებისთვის, სტუდენტებისა და პრაქტიკოსი იურისტებისთვის გაიმართა საჯარო ლექცია თემაზე ,,მედიაცია ქართულ სამართლებრივ სივრცეში და განვითარების პერსპექტივები“, რომელსაც გაუძღვნენ ახალციხის რაიონული სასამართლოს მოსამართლე, სამცხე-ჯავახეთის სახელმწიფო უნივერსიტეტის მოწვეული ლექტორი მარიკა ჩიტაშვილი, სამცხე-ჯავახეთის სახელმწიფო უნივერსიტეტის მოწვეული ლექტორი ნინო ზედგინიძე და ივანე ჯავახიშვილის სახელობის თბილისის სახელმწიფო უნივესიტეტის იურიდიული ფაკულტეტის ასოცირებული პროფესორი, სამართლის დოქტორი, დავის ალტერნატიული გადაწყვეტის ეროვნული ცენტრის აღმასრულებელი დირექტორი ნათია ჩიტაშვილი. 

ღონისძიების დასკვნით ნაწილში კი მედიაციის აკადემიური გაძლიერების ხელშეწყობის მიზნით, სამცხე - ჯავახეთის სახელმწიფო უნივერსიტეტის რექტორის, ასოცირებული პროფესორის მაკა ბერიძისა და ივანე ჯავახიშვილის სახელობის თბილისის სახელმწიფო უნივერსიტეტის დავის ალტერნატიული გადაწყვეტის ეროვნული ცენტრის ხელმძღვანელის, პროფესორ ირაკლი ბურდულის მიერ ხელმოწერილი იქნა ურთიერთთანამშრომლობის მემორანდუმი.

mediacia



2018 წლის 9 მარტს, სამცხე-ჯავახეთის სახელმწიფო უნივერსიტეტის სამეცნიერო ბიბლიოთეკაში გაიმართა ირლანდიაში, კორკის უნივერსიტეტში ERASMUS + ფარგლებში მიმდინარე პროექტის პროექტის-EU-ASSET-ERASMUS+ (Assessment Tools for new learning environments in higher education institutions – 585587-EPP-1-2017-1-IL-EPPKA2-CBHE-JP) - უმაღლესი სასწავლებლების სწავლის შეფასების თანამედროვე ხერხები“ ანგარიში მოსმენა-პრეზენტაცია.
პროექტი, რომლის ფარგლებშიც განხორციელდა საერთაშორისო მობილობა - დაიწყო 15.10.2017 და დასრულდება 14.10.2020 მისი კოორდინატორია კინერეტის აკადემიური კოლეჯი (ისრაელი). ასევე, პარტნიორები არიან ევროპის შემდეგი უნივერსიტეტები: ბამბერგის უნივერსიტეტი (გერმანია), ლინცის განათლების უნივერსიტეტი (ავსტრია), ტალინის უნივერსიტეტი (ესტონეთი), კორკის უნივერსიტეტი (ირლანდია).
პროექტის მიზანია უზრუნველყოს: განმავითარებელი შეფასების მოქნილი სისტემის ჩამოყალიბება; ევროპული უნივერსიტეტების ცოდნისა და გამოცდილების გაზიარება; შემოქმედებითი და ინოვაციური შეფასების მეთოდების შემუშავება/დანერგვა და სხვა, რომელიც ხელს შეუწყობს სწავლისა და სწავლების ხარისხის ამაღლებას საქართველოს და ისრაელის უნივერსიტეტებში.
 
korki


2018 წლის 28 თებერვალს, სსიპ ნატოსა და ევროკავშირის შესახებ საინფორმაციო ცენტრის ოგანიზებით და "აღმოსავლეთ პარტნიორობის სამოქალაქო საზოგადოების მხარდაჭერის პროგრამის“ ფარგლებში ჩატარდა საინფორმაციო შეხვედრა სამცხე-ჯავახეთის სახელმწიფო უნივერსიტეტის (ახალქალაქი,IIIკორპუსი) წარჩინებულ სტუდენტებთან . შეხვედრაზე განიხილული იქნა  საქართველო-ევროკავშირის ურთიერთობები, დახმარების პროგრამები, ევროკავშირთან დაკავშირებული მითები, შესაძლებლობები და სამომავლო პერსპექტივები. შეხვედრას უძღვებოდა საქართველოს უსაფრთხოებისა და განვითარების ცენტრის წარმომადგენლი გიორგი გოგუაძე.
შეხვედრა გაიმართა საქართველოს უსაფრთხოებისა და განვითარების ცენტრის ინიციატივით, საინფორმაციო ცენტრთან ნატოსა და ევროკავშირის შესახებ თანამშრომლობით. შეხვედრა გაგრძელდა კითხვა-პასუხის რეჟიმში. დაიგეგმა სამომავლო აქტივობები. 

შეხვედრის ბოლოს სსიპ ნატოსა და ევროკავშირის შესახებ საინფორმაციო ცენტრთან აქტიური თანამშრომლობისა და სამცხე-ჯავახეთის რეგიონული ბიუროს მხარდაჭერისათვის მადლობის სიგელი გადაეცა სამცხე-ჯავახეთის სახელმწიფო უნივერსტეტის რექტორის მოადგილეს ვასილ მოსიაშვილს

ev2ev3

2018 წლის 28 თებერვალს, სამცხე - ჯავახეთის სახელმწიფო უნივერსიტეტს შინაგან საქმეთა სამინისტროს აკადემიის რექტორი გივი მიქანაძე და არქივის დირექტორი ომარ თუშურაშვილი თანამშრომლების ჯგუფთან ერთად სტუმრობდა. შეხვედრის მიზანი ორ უმაღლეს სასწავლებელს შორის ურთიერთთანამშრომლობის მემორანდუმის გაფორმება იყო. მემორანდუმის ხელმოწერის ცერემონიის შემდეგ დამსწრე აუდიტორიი, სტუდენტების, აკადემიური და ადმინისტრაციული პერსონალის წარმომადგენლებისთვის ნაჩვენები იქნა ფილმი, სადაც მოთხრობილი იყო შსს აკადემიის საქმიანობა, ხოლო შემდეგ გაიმართა სამაგიდე თამაშის ,,შსს არქივის მატიანე" პრეზენტაცია, რომელშიც მონაწილეობა მიიღეს უნივერსიტეტის სტუდენტებმა და აკადემიის წარმომადგენლებმა. სამაგიდე თამაშის მიზანი, შსს არქივში დაცული მასალების პოპულარიზაცია და საქართველოს უახლესი ისტორიის შესახებ საზოგადოების ცნობიერების ამაღლებაა.
საარქივო მასალასთან ერთად სტუდენტები ასევე გაეცნენ მოძრაობის უსაფრთხოების წესებს.
თანამშრომლობის მემორანდუმიდან გამომდინარე სამომავლოდაც სამცხე - ჯავახეთის სახელმწიფო უნივერსიტეტსა და შსს აკადემიას შორის არაერთი საინტერესო პროექტის განხორციელებაა დაგეგმილი.

shsh 1shsh2

 

2018 წლის 27 თებერვალს, შედგა შეხვედრა სამცხე-ჯავახეთის სახელმწიფო უნივერსიტეტის რექტორ მაკა ბერიძესა და ბორჯომის საგანმანათლებლო რესურცენტრის ხელმძღვანელობას შორის, რომელსაც მოწვეული ჰყავდა ბორჯომის მუნიციპალიტეტის საჯარო სკოლების დირექტორები. შეხვედრის მიზანი იყო ბორჯომის საგანმანათლებლო რესურსცენტრსა და უნივერსიტეტს შორის ურთიერთთანამშრომლობის მემორანდუმის გაფორმება, სამცხე-ჯავახეთის სახელმწიფო უნივერსიტეტის მისიის სამუშაო ვერსიის გაცნობა. ასევე მასწავლებლის მომზადების ინტეგრირებული საბაკალავრო-სამაგისტრო 300 კრედიტიანი პროგრამის პრეზენტაცია.

borjomiborjomi 1

გაცვლითი პროგრამის წარმატება! სამცხე-ჯავხეთის სახელმწიფო უნივერსიტეტის განათლების, ჰუმანიტარულ და სოციალურ  მეცნიერებათა ფაკულტეტის, ისტორიის სპეციალობის მესამე კურსის სტუდენტმა არჩილ ჩხიტუნიძემ მონაწილეობა მიიღო გაცვლით პროგრამაში „პირდაპირ მობილობა“. მან ერთი სემესტრი გაატარა პოლონეთის რესპუბლიკის, ლოძის უნივერსიტეტში. არჩილი მშობლიურ უნივერსიტეტს უამრავი დადებითი შთაბეჭდილებით დაუბრუნდა.  შეგახსენებთ, რომ სამცხე-ჯავახეთის სახელმწიფო უნივერსიტეტსა და ლოძის უნივერსიტეტს შორის აღნიშნული გაცვლითი პროგრამა ურთიერთთანამშრომლობის მემორანდუმის ფარგლებში ხორციელდება და უკვე ხუთი წელია წარმატებით მიმდინარეობს.

lodzi 1lodzi 2

 

2018 წლის 25 თებერვალს, სამცხე-ჯავახეთის სახელმწიფო უნივერსიტეტში ჩატარდა სამცხე-ჯავახეთის რეგიონის მოსწავლეთა II ოლიმპიადა მათემატიკაში. ოლიმპიადაში მონაწილეობა მიიღეს სამცხე-ჯავახეთის რეგიონის ხუთი მუნიციპალიტეტის საჯარო სკოლების მოსწავლეებმა (VII-XII კლასები, დაახლოებით 300 მონაწილე). ოლიმპიადა ერთდროულად მიმდინარეობდა უნივერსიტეტის სამივე კორპუსში. ოლიმპიადა გაიხსნა II კორპუსში,ზაზაძის სახელობის საკონფერენციო დარბაზში, ხოლო შემდეგ ერთდროულად დაიწყო მუშაობა უნივერსიტეტის სამივე კორპუსში.მონაწილეებს მიესალმნენ სამცხე-ჯავახეთის რექტორი, ასოცირებული პროფესორი მაკა ბერიძე, რექტორის მოადგილე სამეცნიერო დარგში პროფესორი მერაბ ბერიძე, ინჟინერიის, აგრარულ და საბუნებისმეტყველო მეცნიერებათა ფაკულტეტის დეკანი, პროფესორი გიორგი მესხი, ხოლო III (ახალქალაქი) კორპუსში მონაწილეებს უმასპინძლეს ფიზიკა-მათემატიკის მეცნიერებათა დოქტორმა, პროფესორმა რევაზ ჭიღლაძემ და რექტორის მოადგილემ, ასოცირებულმა პროფესორმა ვასილ მოსიაშვილმა.

mate 1mate2mate3

 

2018 წლის 11-17 თებერვალს ერასმუს+ პროექტის - INTEGRITY Academic Integrity for Quality Teaching and Learning in Higher Education Institutions in Georgia) ფარგლებში შედგა 5 დღიანი შეხვედრა ავსტრიაში, ვენის უნივერსიტეტში, რომელიც პროექტის ერთ-ერთი პარტნიორი ორგანიზაციაა. სამცხე-ჯავახეთის სახელმწიფო უნივერსიტეტიდან შეხვედრას ესწრებოდნენ პროექტის კოორდინატორი, პროფესორი თინა გელაშვილი, ხარისხის უზრუნველყოფის სამსახურის უფროსი, ასოცირებული პროფესორი რევაზ ზედგინიძე და საზოგადოებასთან ურთიერთობის სამსახური სპეციალისტი თეონა ჟუჟუნაძე.შეხვედრა მოიცავდა ორ ნაწილს - 2-დღიან პროექტის “kick-off” შეხვედრას და 3-დღიან მონაწილეთა ტრენინგის პროგრამას (TOT). შეხვედრის დასაწყისში პროექტის ზოგად მიზნებთან გაცნობის შემდეგ თითოეულმა პარტნიორმა ორგანიზაციამ წარადგინა საკუთარი როლი პროექტში.

პროექტი INTEGRITY ოფიციალურად 2017 წლის დეკემბრიდან ხორციელდება და მისი კოორდინატორია ილიას სახელმწიფო უნივერსიტეტი. პროექტში ჩართულია 4 ევროპული და 13 ქართული უმაღლესი საგანმანათლებლო დაწესებულება, მათ შორის კერძო და სახელმწიფო უსდ-ები თბილისის და რეგიონის მასშტაბით.

პროექტი მიზნად ისახავს უმაღლეს საგანმანთლებლო დაწესებულებებში პლაგიატის სისტემის დანერგვისა და აკადემიური კეთილსინდისიერების გაძლიერების გზით სწავლა-სწავლების და შეფასების ხარისხის გაუმჯობესებას.

ვიზიტის მეორე ნაწილში ევროპულმა უნივერსიტეტებმა წარმოადგინეს თავიანი გამოცდილება და პრაქტიკა პლაგიატის სისტემის დანერგვასთან და უნივერსიტეტებში აკადემიური კეთილსინდისიერების გაძლიერებასთან დაკავშირებით.

 ვიზიტის ბოლოს მოხდა სამომავლო აქტივობების დაგეგმვა.

vena   vena 2   vena1


2018 წლის 22 თებერვალს სამცხე-ჯავახეთის სახელმწიფო უნივერსიტეტის  რექტორი მაკა ბერიძე და ინივერსიტეტის სხვა თანამშრომლები გაცნობითი შეხვედრების ფარგლებში ადიგენის საგანმანათლებლო რესურცენტრის ხელმძღვანელობას და საჯარო სკოლების რექტორებს შეხვდა. გარდა გაცნობისა, შეხვედრის მიზანი იყო ადიგენის საგანმანათლებლო რესურსცენტრსა და უნივერსიტეტს შორის ურთიერთთანამშრომლობის მემორანდუმის გაფორმება, სამცხე-ჯავახეთის სახელმწიფო უნივერსიტეტის მისიის სამუშაო ვერსიის გაცნობა. ასევე მასწავლებლის მომზადების ინტეგრირებული საბაკალავრო-სამაგისტრო 300 კრედიტიანი პროგრამის პრეზენტაცია.

შეხვედრა საინტერესოდ გაგრძელდა დისკუსიის ფორმატში.

adigeni adigeni2

 


2018 წლის 17 თებერვალს 14:00 საათზე, სამცხე-ჯავახეთის სახელმწიფო უნივერსიტეტის მეორე კორპუსში, სამაგისტრო პროგრამის განხილვის მიზნით, შედგა შეხვედრა ბიზნესის ადმინიტრირების ფაკულტეტის აკადემიურ პერსონალთან და მაგისტრანტებთან. შეხვედრა აქტიურად წარიმართა, გამოითქვა მოსაზრებები პროგრამის მიზნების, სტრუქტურის, სწავლის შედეგების, შეფასების სისტემის შესახებ, რომლებიც გათვალისწინებული იქნება პროგრამაზე მუშაობის პროცესში.

12 13 1--1

 

ყურადღება! გთხოვთ, გაეცნოთ სამცხე-ჯავახეთის სახელმწიფო უნივერსიტეტის მისიის სამუშაო ვერსიას.


სამცხე-ჯავახეთის სახელმწიფო უნივერსიტეტი არის ერთადერთი უმაღლესი საგანმანათლებლო დაწესებულება სამხრეთ საქრთველოს მრვალეთნიკურ, მრავალკონფესიურ რეგიონში. გაცნობიერებული გვაქვს უნივერსიტეტის განსაკუთრებული საზოგადოებრივი და სოციალური პასუხისმგებლობა. აქედან გამომდინარე უნივერსიტეტის მისიაა:

  • სწავლების სამივე საფეხურზე უზრუნველყოს შრომის ბაზარზე ორიენტირებული მაღალი ხარისხის აკადემიური განათლება;
  • აღზარდოს დემოკრატიული და ჰუმანური იდეალებით, მაღალზნეობრივი, ეროვნული სულისკვეთებით განმსჭვალული და ლიბერალური ღირებულებების მქონე თაობა;
  • ხელი შეუწყოს არაქართულენოვანი მოსახლეობის ინტეგრაციას ქართულ საზოგადოებაში;
  • რეგიონის პრობლემატიკის გათვალისწინებით განახორციელოს სოციალურ-ეკონომიკური და კულტურული მიმართულებით კვლევები, რამაც ხელი უნდა შეუწყოს რეგიონის განვითარებას:
  • ხელი შეუწყოს "სწავლას მთელი სიცოცხლის მანძილზე" და რეგონის შრომის ბაზრის მოთხოვნილებების გათვალისწინებით დანერგოს შესაბამისი პროფესიული პროგრამები;
  • ღირსეული ადგილი დაიკავოს საქართველოს საგანმანათლებლო სივრცეში და საკუთარი წვლილ შეიტანოს ქართული სახელმწიფოს განვითარებაში.

 

 

2018 წლის 19 თებერვალს, სამცხე-ჯავახეთის სახელმწიფო უნივერსიტეტის პავლე ზაზაძის სახელობის საკონფერენციო დარბაზში შედგა სამცხე-ჯავახეთი სახელმწიფო უნივერსიტეტის მისიის სამუშაო ვერსიის გაცნობა, ასევე ბიზნესის ადმინისტრირების ფაკულტეტის საბაკალავრო და სამაგისტრო პროგრამების განხილვა. შეხვედრას ესწრებოდნენ მხარის ადმინისტრაციის, ახალციხის მუნიცპალიტეტის მერიის შესაბამისი სამსახურების წარმომადგენლები და დამსაქმებლები.

სამცხე-ჯავახეთი სახელმწიფო უნივერსიტეტის მისიის სამუშაო ვერსიის გაცნობა და ბიზნესის ადმინისტრირების პროგრამები დამსწრე საზოგადოებას სამცხე-ჯავახეთის სახელმწიფო უნივერსიტეტის რექტორმა მაკა ბერიძემ წარუდგინა.

შეხვედრა აქტიურად წარიმართა კითხვა-პასუხის რეჟიმში, იყო საქმიანი წინადადებები/შენიშვნები, რომელიც ასახვას ჰპოვებს უნივერსიტეტის მისიისა და ბიზნესის ადმინისტრირების ფაკულტეტის პროგრამების საბოლოო შემუშავებაში.

misia1  misia2  misia3


ყურადღება! სამცხე-ჯავახეთის სახელმწიფო უნივერსიტეტის ინჟინერიის, აგრარულ და საბუნებისმეტყველო მეცნიერებათა  ფაკულტეტის  აგრონომიის სადოქტორო პროგრამის ფარგლებში  დოქტორანტთა სემინარი გაიმართება 9 თებერვალს  14 საათზე. 

 

მისამართი:  ქალაქი თბილისი, რუსთაველის გამზ.N 52, საქართველოს მეცნიერებათა ეროვნული ბიბლიოთეკა.